Kliem ir-Riħ

Simon Bartolo

“Ġejja l-mewt,” qaltilhom u l-oħrajn kollha siktu għal mument twil. X’kien fettlilha bdiet hekk? Imma issa kienet fattritha u kellha tkompli.

“Fuq min ġejja l-mewt?” staqsiet Annalise.

“Fuqi ovvjament,” iddeċieda Michel.

“Guys, mhux aħjar nieqfu minn din il-bluha?” qalilhom Kurt. “intom qed taqalgħu xebgħa paniku għalxejn. Cynthia qed tgħidilkom li kellimha r-riħ u intom qed tagħtu kasha! Mela qed niġġennu lkoll kemm aħna jew?”